အဆင့်မြင့်တက္ကသိုလ် (Centre of Execllence)များ တည်ထောင်ခြင်းနှင့် လုပ်ငန်းလိုအပ်ချက်များ

နိဒါန်း
၁။ သိပံ္ပနှင့်နည်းပညာ ဝန်ကြီးဌာနအောက်ရှိ နည်းပညာတက္ကသိုလ်၊ ကောလိပ်၊
သိပံ္ပ၊ ကျောင်းများနှ
င့် ကွန်ပျူတာ တက္ကသိုလ်များ၏ ပညာရည်မြင့်မားရေး
ညှိနှိုင်းအစည်းအဝေးကို နေပြည်တော်ရှိ ၀န်ကြီးရုံးတွင်
ကျင်းပခဲ့ကြောင်းကို ၁၂-၈-၂-၁၂ ရက်နေ့ထုတ်

နိုင်ငံပိုင်သတင်းစာများတွင်ဖော်ပြချက်အရသိရှိရပါသည်။

ထိုသို့ဆွေးနွေးရာတွင် ရန်ကုန်နည်းပညာ တက္ကသိုလ်၊ မန္တလေးနည်းပညာတက္ကသိုလ်၊
ရန်ကုန်ကွန်ပျူတာတက္ကသိုလ်နှင့် မန္တလေးကွန်ပျူတာတက္ကသိုလ်တို့ကို
အဆင့်မြင့် နည်းပညာတက္ကသိုလ်နှင့် အဆင့်မြင့် ကွန်ပျူတာတက္ကသိုလ်များ
(Centre of Excellence) များ အဖြစ် ၂၀၁၂-၂၀၁၃ ပညာသင်နှစ်မှ
စတင်ဖွင့်လှစ်မည်ဖြစ်ကြောင်း ဖတ်ရှုလိုက်ရသဖြင့် ယခုဆောင်းပါးကို
ရေးသားရခြင်းဖြစ်ပါသည်။ 

ယခုဆောင်းပါးတွင် အဆိုပါ အဆင့်မြင့်တက္ကသိုလ်များဖွင့်လှစ်ပါက ဖြစ်နိုင်ခြေရှိမှုနှင့်
လုပ်ငန်းလိုအပ်ချက်များကို တင်ပြသွားမည်ဖြစ်ပါသည်။

နောက်ခံအကြောင်းအရင်း

၂။ သိပံ္ပနှင့်နည်းပညာ ဝန်ကြီးဌာနကို ၁၉၉၇ ခုနှစ်တွင် စတင်ဖွဲ့စည်းခဲ့ပြီး
ထိုနှစ်တွင်ပင် စက်မှုတက္ကသိုလ်များ၊ ကွန်ပျူတာတက္ကသိုလ်များ၊ စက်မှုလက်မှု
သိပ္ပံများကို အဆိုပါဝန်ကြီးဌာန၏ စီမံခန့်ခွဲမှုအောက်တွင်
ဆောင်ရွက်ခဲ့ပါသည်။ ထိုအချိန်မှစတင်၍ တက္ကသိုလ်များ၊ ကောလိပ်များ
ချဲ့ထွင်တည်ဆောက်ခဲ့ရာ ယခုအခါ သိပံ္ပနှင့်နည်းပညာ ဝန်ကြီးဌာနလက်အောက်တွင်
နည်းပညာတက္ကသိုလ် ၃၃ ခု၊ ကွန်ပျူတာတ္ကသိုလ် ၂၅  ခု၊ နည်းပညာကောလိပ်နှင့်
စက်မှုလက်မှုသိပ္ပံများဖြင့် ပညာရေးဝန်ကြီးဌာနပြီးလျှင် ဒုတိယ မြောက်
တက္ကသိုလ်ကောလိပ် အများဆုံး ၀န်ကြီးဌာနပင်ဖြစ်နေပြီဖြစ်ပါသည်။
သို့သော်လည်း ဖွင့်လှစ်ခဲ့သော တက္ကသိုလ်များမှာ အရည်အချင်းထက်
အရေအတွက်များကိုသာ မွေးထုတ်ပေးနိုင်ခဲ့သဖြင့် ပြုပြင်ပြောင်းလဲရန်
လိုအပ်လာခြင်းပင်ဖြစ်ပါသည်။ ယခုကဲ့သို့ အဆင့်မြင့်တက္ကသိုလ်များ (Centre
of Execllence)များ တည်ထောင်ခြင်းသည်ပင် ယခင်စစ်အစိုးရ လက်ထက်က
ဆောင်ရွက်ခဲ့သော နည်းပညာတက္ကသိုလ်များ၊ ကွန်ပျူတာတက္ကသိုလ်များသည်
အဆင့်မမီခဲ့ကြောင်းကို ၀န်ခံလိုက်ခြင်းပင် ဖြစ်ပေသည်။

၃။ ထိုကဲ့သို့ဖြစ်ရသည်မှာလည်း ထိုအချိန်က အစိုးရအနေဖြင့်
စဉ်းစားဆောင်ရွက်ရာတွင် ဖွံ့ဖြိုးရေးဒေသကြီး ၂၄ တွင်
နည်းပညာတက္ကသိုလ်တစ်ခု၊ ကွန်ပျူတာတက္ကသိုလ်တစ်ခု၊ ၀ိဇ္ဇာသိပ္ပံ တက္ကသိုလ်တစ်ခု
ရှိစေရမည်ဟူသော မူအရ ဆောင်ရွက်ခဲ့ခြင်းဖြစ်ရာ Single Point of View
တစ်ခုတည်းမှ စဉ်းစားခဲ့ခြင်းဖြစ်သဖြင့် အရည်အသွေးပိုင်းဆိုင်ရာ
ချွတ်ယွင်းအားနည်းချက်များဖြစ်ပေါ်ခဲ့ရခြင်းဖြစ်ပေသည်။ ထို့အပြင်
တက္ကသိုလ်များအား မလိုအပ်ပဲ မြို့ပြင်သို့ ထုတ်ခဲ့ခြင်းကလည်း
မလိုလားအပ်သော နောက်ဆက်တွဲ ပြသနာများစွာကို ဖြစ်ပေါ်စေခဲ့သည်ကို အားလုံး
သိရှိပြီး ဖြစ်ပေသည်။ ထို့ပြင် တက္ကသိုလ်များကိုလည်း သွားရေးလာရေးလွယ်ကူမှု
မရှိသော နေရာများသို့ပို့ထားပြီး သွားလာ ဆက်သွယ်ရေးကို အဆင်ပြေအောင်
ဖန်တီးမပေးနိုင်ခြင်းကလည်း အရည်အသွေးကျဆင်းရခြင်း၏ အကြောင်းအရင်း
တစ်ရပ်ပင်ဖြစ်ပေသည်။

တက္ကသိုလ်များ၏တည်နေရာနှင့် အရင်းအမြစ်များ

၎။ လက်ရှိ အဆင့်မြင့်တက္ကသိုလ်များ (Centre of Execllence)များအဖြစ်
တည်ထောင်ဖွင့်လှစ်မည့် တက္ကသိုလ်များ၏ အောင်မြင်နိုင်မှု အလားအလာကို
အဆိုပါတက္ကသိုလ်များ၏ တည်နေရာ၊ အဆောက်အအုံများ၊ လမ်းပန်း
ဆက်သွယ်ရေးဖြည့်ဆည်းပေးနိုင်မှု၊
အခြားလိုအပ်ချက်ဖြည့်ဆည်းပေးနိုင်မှုတို့အပေါ် အခြေခံ၍ စဉ်းစားကြည့်မည်
ဖြစ်ပါသည်။

        (က) ရန်ကုန်နည်းပညာတက္ကသိုလ် ရန်ကုန်နည်းပညာတက္ကသိုလ်သည် တစ်ချိန်က
နံမည်ကျော် ရန်ကုန်စက်မှုတက္ကသိုလ်နေရာတွင်ဖွင့်လှစ်မည်ဖြစ်ခြင်း၊
အဆောက်အဦများ ပြည့်စုံလုံလောက်စွာရှိပြီးဖြစ်ခြင်း၊ အရည်အချင်းပြည့်ဝသော
ဆရာဟောင်းများက ပြန်လည်ကူညီနိုင်ခြင်း၊
ကျောင်းသား၊ကျောင်းသူများအတွက်လည်း နေထိုင်စရာ အဆောင်များ
ရှိပြီးဖြစ်ခြင်းတို့ကြောင့် အောင်မြင်အောင် ဆောင်ရွက်ရန်
အလားအလာကောင်းများစွာ ရှိနေသည်ကို တွေ့ရှိရပါသည်။ ထို့ပြင် Capus Life
Structure ကိုပေးနိုင်ရန် အလွန်ကောင်းသော အနေအထားလည်းဖြစ်ပါသည်။
သင်ကြားရေးစွမ်းအားဖြစ်သော ဆရာ၊ဆရာမများလည်း ပြည့်စုံသော အနေအထား
တစ်ခုတွင် တည်ရှိနေသည်ကို တွေ့ရှိရမည်ဖြစ်ပါသည်။ သက်ဆိုင်ရာ
ဌာနအသီးသီးတွင် ဖွဲ့စည်းပုံအင်အားပြည့် ဖြည့်တင်းနိုင်သော အနေအထားတွင်
ရှိနေပါသည်။

        (ခ) ရန်ကုန်ကွန်ပျူတာတက္ကသိုလ် ရန်ကုန်ကွန်ပျူတာတက္ကသိုလ်အနေဖြင့်
ယခုလက်ရှိနေရာတွင် အဆင့်မြင့်တက္ကသိုလ် (Centre of Execllence)အဖြစ်
ဆောင်ရွက်မည်ဆိုပါက ဖြစ်နိုင်ခြေ နည်းနေမည်ဖြစ်သည်။ အဘယ်ကြောင့်ဆိုသော
တည်နေရာ အနေအထား၊ အခြေခံအဆောက်အဦလိုအပ်ချက်၊ လမ်းပန်းဆက်သွယ်ရေးတို့သည်
အဓိက ပြသနာပင်ဖြစ်ပေသည်။ ယခုလက်ရှိအနေအထားအရ စာသင်ဆောင်များနှင့်
အောက်ခြေ၀န်ထမ်းများအတွက် ထရံကာသွပ်မိုးနေထိုင်ရာ တန်းလျားသာ
ရှိနေသေးသည်ဖြစ်ရာ ရုံးဝန်ထမ်းများ၊ သင်ကြားရေးဝန်ထမ်းများ နေထိုင်ရန်
ဝန်ထမ်းအိမ်ရာများ၊ ကျောင်းသားကျောင်းသူများအတွက် အဆောင်များ
ဆောက်လုပ်ရန်လိုအပ်နေအုံးမည်ဖြစ်သည်။ Capus Life Structure
ကိုပေးနိုင်ရန် မဖြစ်နိုင်သေးသည်ကို တွေ့ရှိရပေသည်။ ထို့ပြင်
သင်ကြားရေးစွမ်းအားဖြစ်သော ဆရာ၊ဆရာမ အင်အားမှာ ပြည့်စုံသော အနေအထားတွင်
မရှိသည်ကို တွေ့ရှိရမည်ဖြစ်ပါသည်။ သက်ဆိုင်ရာ ဌာနအသီးသီးတွင်
ဖွဲ့စည်းပုံအင်အားပြည့် ဖြည့်တင်းနိုင်သော အနေအထားတွင်
မရှိကြောင်းတွေ့ရှိရမည်ဖြစ်သည်။

        (ဂ) မန္တလေးနည်းပညာတက္ကသိုလ် မန္တလေးနည်းပညာတက္ကသိုလ်သည် တည်နေရာအနေအထားအရ
မန္တလေးမြို့နှင့် အလှမ်းဝေးသည့်နေရာတွင် တည်ရှိနေသော်လည်း
အခြေခံအဆောက်အအုံများ မှာမူ ပြည့်စံလုံလောက်မှု ရှိသည်ကို
တွေ့ရမည်ဖြစ်သည်။ Capus Life Structure ကိုပေးနိုင်ရန် အလွန်ကောင်းသော
အနေအထားလည်း ဖြစ်ပါသည်။ သို့ဖြစ်ရာ အောင်မြင်နိုင်သော
အနေအထားတွင်ရှိသည်ကို တွေ့ရမည်ဖြစ်ပါသည်။

        (ဃ) မန္တလေးကွန်ပျူတာတက္ကသိုလ် မန္တလေးကွန်ပျူတာတက္ကသိုလ်သည်
တည်နေရာအလှမ်းဝေးနေသည်။ သို့သော် အဆိုပါတက္ကသိုလ်သည်
အခြေခံအဆောက်အအုံအနေအထားမှာ Semi ပြည့်စုံသည်ဟု ဆို၍ ရပေသည်။
ဝန်ထမ်းအိမ်ရာများ သင့်တင့်စွာ တည်ရှိနေပြီးဖြစ်သဖြင့်
ကျောင်းသား၊ကျောင်းသူများအတွက် အဆောင် ဆောက်လုပ်ရန်သာ လိုအပ်မည်ဖြစ်သည်။
သို့သော သင်ကြားရေးစွမ်းအားဖြစ်သော ဆရာ၊ဆရာမများတွင် ပြည့်စုံမှု
မရှိသည်မှာ ရန်ကုန်ကွန်ပျူတာတက္ကသိုလ်ထက်ပင် ဆိုးရွားသည်ကို တွေ့ရပါသည်။
ပွင့်ပွင့်လင်းလင်းပြောရမည်ဆိုလျှင် ရန်ကုန်ကွန်ပျူတာတက္ကသိုလ်နှင့်
မန္တလေးကွန်ပျူတာတက္ကသိုလ် နှစ်ခုပေါင်းလျင်ပင် သင်ကြားရေးဌာနများ
အမှန်အင်အားပြည့်ဖွဲ့စည်းပုံကို ရရှိနိုင်မည်မဟုတ်သည်ကို
တွေ့ရမည်ဖြစ်သည်။ စုစုပေါင်း ပါမောက္ခ အရေအတွက်မှာ ဌာနအင်အား၏
ထက်ဝက်ခန့်သာ ရှိနေသည်ဖြစ်ရာ ပညာရှင်ခါးဆက်ပြတ်နေသည်ကို တွေ့ရပါသည်။

သတိထားချဉ်းကပ်သင့်သောအချက်များ

၅။ တက္ကသိုလ်များတွင် Capus Life Structure ကို ပေးနိုင်ခြင်းမရှိပါက
ကျောင်းသာကျောင်းသူများအနေဖြင့် နံနက်ကျောင်းလာတက်၊ ညနေကျောင်းကပြန်သော
အထက်တန်းကျောင်းသားဘ၀နှင့် ထူးခြားသာလွန်မှုမရှိသော အခြေအနေကြောင့်
တက္ကသိုလ်ကျောင်းသားစိတ်ဓာတ်ကို ရရှိစေရန်ခက်ခဲမည်ဖြစ်သည်။ ထို့ပြင် Capus
Life Structure ကို မပေးနိုင်ပါက ကျောင်းသား၊ ကျောင်းသူများအတွက်
သွာလာရေးအတွက် အချိန်ကုန်နေမည်မှာလည်း မလိုလားအပ်သော အချိန်ကို
ဖြုန်းတီးနေခြင်းပင်ဖြစ်ပေသည်။
၆။ ထို့ပြင် အထူးသတိပြုရန်လိုအပ်သောအချက်မှာ ဤ Centre of Excellence
များကို မည်မျှအချိန်ယူ၍ ပြင်ဆင်ခဲ့သနည်း
ဆိုသည့်အချက်ကလည်းမေးခွန်းထုတ်ရန်လိုအပ်နေသည်ကိုတွေ့ရသည်။
ယခုပညာနှစ်တွင်ဖွင့်လှစ်မည် ကို
တက္ကသိုလ်ဝင်စာမေးပွဲအောင်စာရင်းများထုတ်ပြန်ပြီး
တက္ကသိုလ်ဝင်ခွင့်လျှောက်လွှာတွင် ပါဝင်နိုင်ခြင်းမရှိပဲ နည်းပညာ
တက္ကသိုလ်များဆိုလျှင် နောက်ဆက်တွဲစာရွက်ဖြင့်ထည့်ရခြင်း၊
ကွန်ပျူတာတက္ကသိုလ်များဆိုလျှင် စာအုပ်တွင်ပင် ပါဝင်ခြင်းမရှိပဲ
နောက်ဆက်တွဲလျှောက်လွှာခေါ်ယူရခြင်းများသည်လည်း အဘယ်ကြောင့်ဖြစ်ရသည်ကို
လေ့လာ ဆန်းစစ်ရန် လိုအပ်မည်ဖြစ်သည်။ ကြိုတင်ပြင်ဆင်မှုမရှိသော အစီအစဉ်အပေါ်
လက်ခံယုံကြည်ရန်မှာ ခက်ခဲမည် ဖြစ်သည်။

၇။ ထို့ပြင် အဆိုပါ Centre of Excellence တက္ကသိုလ်များတွင်
အထူးပြုဘွဲ့များကိုပေးအပ်မည်ကို ဖော်ပြထားချက်များ ရှိရာ ထိုကဲ့သို့
အထူးပြုဘွဲ့များပေးအပ်နိုင်ရန် လုံလောက်သော သင်ကြားရေးဝန်ထမ်းအင်အား၊
ပြည့်စုံသောကျွမ်းကျင်မှု၊ ပြည့်စုံကောင်းမွန်သော
သင်ထောက်ကူပစ္စည်းများနှင့် လက်တွေ့စမ်းသပ်ခန်းများ ရှိမရှိမှာလည်း
အထူးမေးမြန်းရန် လိုအပ်နေသည်။ ထိုသို့ မဟုတ်ပဲ လုံလောက်သော
အရင်းအမြစ်မရှိပဲဆောင်ရွက်ခြင်းဖြစ်ပါက အကျိုးမဲ့ဖြစ်မည်သာ ဖြစ်သည်။
သင်ကြားရေးဆိုင်ရာ ၀န်ထမ်းများကို အထူးပြုသင်ကြားမည့်ဘာသာရပ်အလိုက်
ကျွမ်းကျင်အရည်အချင်းမည်မျှ ရှိသည်ကို မည်ကဲ့သို့အကဲဖြတ်မည်၊
သင်ကြားရေးဆိုင်ရာ သင်ရိုးညွှန်းတမ်းများ၊ သင်ကြားမည့် ပြဋ္ဌာန်းစာအုပ်များ၊
ရည်ညွှန်းစာအုပ်များကို မည်ကဲ့သို့သောစံများဖြင့် ပြုစုခဲ့ကြသည်ကလည်း
တက်ရောက်မည့်ကျောင်းသားမိဘများ သိရှိလိုသောအချက်များဖြစ်နေသည်။
ထိုမေးခွန်း၏အဖြေကို တိကျစွာပေးနိုင်မည်ဆိုပါက အမှန်တကယ် အရည်အချင်း
ရှိသော Centre of Excellence တက္ကသိုလ်များဖြစ်ပေါ်လာနိုင်မည်ဖြစ်သည်။ ယခု
လက်ရှိသင်ကြား ပေးနေသော ဘာသာရပ်ကိုပင်
ထိရောက်အောင်သင်ကြားပေးနိုင်ခြင်းမရှိသေးပဲ အထူးပြုဘာသာရပ်များကို
ထပ်မံတိုးချဲ့သင်ကြားမည် ဆိုသည်မှာ လက်တွေ့မည်မျှဖြစ်နိုင်သည် ဆိုသည်ကို
စဉ်းစားဆင်ခြင်ဖွယ်ပင်ဖြစ်ပေသည်။ လက်ရှိ အဆိုပါတက္ကသိုလ်များ သည်
အစိုးရတက္ကသိုလ်များပင်ဖြစ်ရာ အထူးပြုဘာသာရပ်တိုးချဲ့သင်ကြားပါက
လိုအပ်လာမည့် Facility အားလုံးကို ဖြည့်ဆည်းပေးနိုင်မှု ရှိ၊ မရှိ
ဆိုသည်မှာလည်း အထူးစဉ်းစားအပ်သော အချက်ဖြစ်သည်။

၈။ ထို့ပြင် အထူးသတိထားချဉ်းကပ်ရန်မှာ ၂၀၁၀ ပြည့်နှစ်တွင်
သတင်းအချက်အလက်နည်းပညာဆိုင်ရာ အကောင်းဆုံး
တက္ကသိုလ်အဖြစ်ရည်ရွယ်ဖွင့်လှစ်ခဲ့သော
နည်းပညာတက္ကသိုလ်(ရတနာပုံဆိုင်ဘာစီးတီး) ၏ လက်ရှိ အဆင့်အတန်း
အခြေအနေသည်လည်း သိပ္ပံနှင့်နည်းပညာဝန်ကြီးဌာန၏
လုပ်ငန်းဆောင်ရွက်အကောင်အထည်ဖော်မှုအရည်အချင်းကို
မေးခွန်းထုတ်ဖွယ်ဖြစ်နေပေသည်။ အဆိုပါ
နည်းပညာတက္ကသိုလ်(ရတနာပုံဆိုင်ဘာစီးတီး) ပင် ထူးခြားသော အောင်မြင်မှု
မရရှိသေးပဲ နောက်ထပ် Centre of Excellence တက္ကသိုလ်များ
တည်ထောင်ဖွင့်လှစ်ခြင်းမှာ အဘယ်ကြောင့်နည်း ဆိုသည်ကို
သိရှိရန်လိုအပ်ပေသည်။ ထို့ပြင် ၁၉-၈-၂၀၁၂ ရက်နေ့ထုတ်
နိုင်ငံပိုင်သတင်းစာများတွင် Centre of Excellence
တက္ကသိုလ်များအကြောင်းကို ဆောင်းပါးရေးသွင်းဖော်ပြလာသောအခါ ၁၉၉၇
ခုနှစ်တွင် မန္တလေးကွန်ပျူတာ တက္ကသိုလ်ကို စတင်ဖွင့်လှစ်စဉ်က
ငါးနှစ်မှလေးနှစ်သို့ လျော့ချပြီး ဖွင့်လှစ်ရန်ခေါ်ဆိုစဉ်က ထိုအချိန်က
နိုင်ငံပိုင် သတင်းစာများတွင် ငါးနှစ်မှ လေးနှစ်သို့လျော့ချ သော်လည်း
စာသင်ချိန်များ ပိုမိုလာကြောင်းကို တွက်ချက်ကာ ဖော်ပြခဲ့ ဖူးသည်ကို
သတိရမိပါသည်။ သို့သော် နောက်တစ်နှစ် ၁၉၉၈ တွင်မူ လေးနှစ်မှ
သုံးနှစ်သို့လျော့ချခြင်း၊ ၁၉၉၉ ခုနှစ်တွင်
အစိုးရကွန်ပျူတာကောလိပ်များဖွင့်လှစ်ခဲ့ပြီး ကွန်ပျူတာသိပ္ပံဘွဲ့(B.C.Sc)
နှင့် ကွန်ပျူတာနည်းပညာဘွဲ့ (B.C.Tech) များကို
သုံးနှစ်ဖြင့်အပ်နှင်းခဲ့သည်ကို သမိုင်းမှတ်တမ်းအဖြစ်
ဖြောက်ဖျက်မရဘဲရှိနေသည်။ ယခုတစ်ဖန် ယခင်ပုံစံ အတိုင်းပင်
တစ်ပုံစံတည်းဖြစ်နေသည်ကို တွေ့ရှိရသည်ဖြစ်ရာ စိတ်ချယုံကြည်နိုင်ရန်မှာ
အလွန်ပင် ခက်ခဲနေမည် ဖြစ်သည်။

၉။ ထို့အပြင် နည်းပညာတက္ကသိုလ်၊ ကွန်ပျူတာတက္ကသိုလ် မြောက်များစွားကို
နေရာအနှံ့ဖွင့်လှစ်ခဲ့ခြင်း၏ မူလ ရည်ရွယ်ချက်ကို
ပြည်ထောင်စုရာထူးဝန်အဖွဲ့  ဥက္ကဋ္ဌ ဦးကျော်သူက  “ယခုအချိန်၌
တိုင်းဒေသကြီးနှင့် ပြည်နယ် (၁၄)ခုစလုံးတွင် တက္ကသိုလ်၊ နည်းပညာတက္ကသိုလ်၊
ကွန်ပျူတာ တက္ကသိုလ်နှင့် ဒီဂရီကောလိပ်များကို နိုင်ငံတော် အစိုးရက
ဖွင့်လှစ်တည်ထောင် ပေးခဲ့ပြီးဖြစ်ပါကြောင်း၊ နိုင်ငံတော်က
ဘဏ္ဍာငွေကြေးများစွာအကုန်အကျခံပြီး တက္ကသိုလ်/ ကောလိပ်များကို
နိုင်ငံတစ်ဝန်းဖွင့်လှစ်ပေးရသည့် အဓိကရည်ရွယ်ချက်မှာ နိုင်ငံတော်၏
နယ်မြေဒေသ အသီးသီးတွင် အကြားအလပ်မရှိ ဖွံ့ဖြိုးတိုးတက်မှုရှိစေရန်နှင့်
တိုင်းဒေသကြီး/ ပြည်နယ်အနှံ့မှ တိုင်းရင်းသားလူငယ်များ အနေဖြင့်
မိမိရပ်ရွာဒေသအတွင်း၌ပင် မိဘဆွေမျိုးများနှင့် မခွဲမခွာ
ပညာဆက်လက်ဆည်းပူးနိုင်ကြစေရန် ဖြစ်ပါကြောင်း” ဖြင့်  ၂၁-၉-၂၀၁၁ ရက်နေ့က
ကျင်းပသော ပထမအကြိမ်အမျိုးသားလွှတ်တော် ဒုတိယပုံမှန် အစည်းအဝေး (၂၂)ရက်
မြောက်နေ့တွင် စစ်ကိုင်းတိုင်းဒေသကြီး မဲဆန္ဒနယ် အမှတ်(၁၁)မှ
ဦးအောင်ချစ်လွင်၏ မေးခွန်းကို ပြန်လည် ဖြေကြားခဲ့ရာ ယခု Centre of
Excellence ဆောင်ရွက်ချက်သည် ဤ မူလရည်ရွယ်ချက်နှင့် ကိုက်ညီမှု
ရှိမရှိကိုလည်း ပြန်လည်ဆန်းစစ် သင့်ပေသည်။

၁၀။ ပထမအကြိမ် ပြည်သူ့လွှတ်တော် တတိယပုံမှန်အစည်းအဝေးစတုတ္ထနေ့ (၁၅-၂-၂၀၁၂)
တွင် ဒဂုံမြို့သစ်(မြောက်ပိုင်း) မဲဆန္ဒနယ်မှ ဒေါ်တင်နွယ်ဦး က ပြည်ထောင်စု
သမ္မတမြန်မာနိုင်ငံတော် အဆင့်မြင့်ပညာရေး ကဏ္ဍ၏ တက္ကသိုလ်များအား
သီးခြားလွတ်လပ်သည့် ကိုယ်ပိုင်စီမံခန့်ခွဲမှု (Autonomony) ရှိသော
အစိုးရတစ်ပိုင်း အဖွဲ့အစည်း(Agency)များအဖြစ် ပြောင်းလဲဖွဲ့စည်းနိုင်မည့်
ဥပဒေ(Statute Law)ပြဋ္ဌာန်းပေးရန် ဤလွှတ်တော်က တိုက်တွန်းကြောင်း
အဆိုကိုတင်သွင်းခဲ့ပြီး ပညာရေးဝန်ကြီးဌာန ဒေါက်တာမြအေးက
အဆိုရှင်တင်သွင်းသည့် Statute Law ပြဋ္ဌာန်းရန် အချိန်စောလွန်း
သေးပါကြောင်းဖြင့် တင်ပြခဲ့သဖြင့် မဲခွဲဆုံးဖြတ်ရာ
ကန့်ကွက်မဲများသည့်အတွက် အဆိုအတည်မဖြစ်ကြောင်းနှင့်
အဆိုတင်သွင်းခြင်းနှင့် ပတ်သက်၍ လွှတ်တော်တွင် မှတ်တမ်းတင် ထားရှိမည်
ဖြစ်ကြောင်းဆုံးဖြတ်ခြင်းခံခဲ့ရခြင်း၊ ကန်ပက်လက်မဲဆန္ဒနယ်မှ သူရဦးအောင်ကို
က အမျိုးသား တက္ကသိုလ် (National University ) ဥပဒေ
ပြဋ္ဌာန်းတည်ထောင်ဖွင့်လှစ်ရန် အဆိုတင်သွင်းခဲ့သော်လည်း  ကန့်ကွက်ဆန္ဒမဲ
များသည့်အတွက် အဆို အတည်မဖြစ်ကြောင်းနှင့် လွှတ်တော်က
အဆိုကိုမှတ်တမ်းတင်ထားရှိမည်ဖြစ်ကြောင်း ဆုံးဖြတ်ခြင်း ခံခဲ့ရခြင်းများ
ရှိခဲ့သော်လည်း ပထမအကြိမ် ပြည်သူ့လွှတ်တော်
စတုတ္ထပုံမှန်အစည်းအဝေး(၁၈)ရက်မြောက်နေ့ (၃၁-၇-၂၀၁၂) တွင်
တက္ကသိုလ်ပညာရေးဥပဒေကြမ်းနှင့်စပ်လျဉ်း၍  ဒဂုံမြို့သစ်(မြောက်ပိုင်း)
မဲဆန္ဒနယ်မှ ဒေါ်တင်နွယ်ဦး က ကန့်ကွက် ဆွေးနွေးခဲ့ပြီး ကန်ပက်လက်မဲဆန္ဒနယ်မှ
သူရဦးအောင်ကို က ကန့်ကွက်မှုကိုထောက်ခံခဲ့ကာ ကော့မှူး မဲဆန္ဒနယ်မှ
ဒေါ်အောင်ဆန်းစုကြည်က ဆွေးနွေးရာတွင်လည်း တက္ကသိုလ်များကို ၀န်ကြီးဌာနများ၏
သြဇာအာဏာ အောက်တွင် ထားရှိခြင်းမရှိမှသာ ခေတ်နှင့်လျော်ညီသော
လွပ်လပ်သည့်တက္ကသိုလ်များဖြစ်နိုင်ကြောင်း ဆွေးနွေးခဲ့သည်ကို တွေ့ရမည်
ဖြစ်သည်။ ထို့ပြင် သင်္ဃန်းကျွန်းမဲဆန္ဒနယ်မှ ဦးသိန်းညွန့်က “၂၀၁၂ ခုနှစ်၊
တက္ကသိုလ် ပညာရေးဥပဒေကြမ်း ဆွေးနွေးခြင်းအား ရွှေ့ဆိုင်းပေးရန်”
အဆိုကိုတင်သွင်းခဲ့ရာ ဥပဒေကြမ်းဆွေးနွေးခြင်းကို ရွှေ့ဆိုင်းခဲ့ပြီး
ဥပဒေကြမ်းနှင့် စပ်လျဉ်း၍ လွှတ်တော်ကိုယ်စားလှယ်များ၏ဆွေးနွေးချက်များအရ
ဥပဒေကြမ်း ဆွေးနွေးခြင်းကို ရွှေ့ဆိုင်းပြီး ဥပဒေကြမ်းကော်မတီ၊
ဥပဒေရေးရာနှင့်အထူးကိစ္စရပ်များ လေ့လာဆန်းစစ် သုံးသပ်ရေး ကော်မရှင်၊
သက်ဆိုင်ရာ ပြည်ထောင်စုဝန်ကြီးဌာနနှင့် စိတ်ဝင်စားသည့်
လွှတ်တော်ကိုယ်စားလှယ်များ ညှိနှိုင်းရေးဆွဲကာ ပြည်သူ့လွှတ်တော် ဥက္ကဋ္ဌထံ
တင်ပြရန်နှင့် တင်ပြချက်အပေါ်မူတည်ပြီး လွှတ်တော်၏ ဆန္ဒရယူ၍ဆက်လက်ဆောင်ရွက်
သွားမည်ဖြစ်ကြောင်း သိရှိရသည်ဖြစ်ရာ အဆိုပါတက္ကသိုလ်ဥပဒေပေါ်ထွက်လာပါက
လက်ရှိအနေအထားနှင့် မည်ကဲ့သို့ ဆက်လက် ဆောင်ရွက်မည် ကိုလည်း
ကြိုတင်စဉ်းစားစီစဉ်ထားခြင်း ရှိ၊မရှိဆိုသည်ကလည်း အရေးပါပေသည်။
၁၁။ ပထမအကြိမ် ပြည်သူ့လွှတ်တော် စတုတ္ထပုံမှန်အစည်းအဝေး(၂၂)ရက်မြောက်နေ့
(၈-၈-၂၀၁၂)ကမာရွတ်မဲဆန္ဒနယ်မှ ဒေါက်တာစိုးရင်က မြန်မာနိုင်ငံရှိ
တက္ကသိုလ်အသီးသီးတွင် ဘွဲ့လွန်၊ ဘွဲ့ကြိုကျောင်းသား/ကျောင်းသူများအတွက်
ကျောင်းဆောင်များဖွင့်လှစ်ထားရှိပြီး အဆောင် နေခွင့်စနစ်ကို
ကျင့်သုံးအကောင်အထည်ဖော်ဆောင်ရွက်ပေးရန်အတွက် ဤလွှတ်တော်မှ
တိုက်တွန်းကြောင်းအဆိုကိုတင်သွင်းရာ ယင်းအဆိုနှင့်စပ်လျဉ်း၍
ပြည်သူ့လွှတ်တော်ပညာရေးမြှင့်တင်မှု ကော်မတီ ဥက္ကဋ္ဌ ဒေါက်တာချမ်းငြိမ်းက
နိုင်ငံတကာတက္ကသိုလ်များတွင်လည်း တက္ကသိုလ်တိုင်း၌ အဆောင်များ
မရှိပါကြောင်း၊ မိမိတို့နိုင်ငံ၌ အဆင်ပြေမည့်တက္ကသိုလ်များတွင်
အဆင်ပြေမည့်အချိန်၌ အဆောင်များထားရှိရန် သင့်လျော်ပါကြောင်းဖြင့်
ဆွေးနွေးတင်ပြသဖြင့် ယင်းအဆိုအား လွှတ်တော်က မှတ်တမ်းတင်ထားရှိရန်
ဆုံးဖြတ်ခဲ့သည်။

ထိုမျှသာမက ပထမအကြိမ် အမျိုးသားလွှတ်တော်
စတုတ္ထပုံမှန်အစည်းအဝေး(၂၈)ရက်မြောက်နေ့ (၁၆-၈-၂၀၁၂) တွင်
မကွေးတိုင်းဒေသကြီး မဲဆန္ဒနယ်အမှတ်(၂)မှ ဦးအောင်ငြိမ်းက “ပြည်ထောင်စု
သမ္မတမြန်မာနိုင်ငံတော် နိုင်ငံတစ်ဝန်းလုံး၌ ပညာရေးကဏ္ဍတွင် ဟန်ချက်ညီစွာ
တစ်ပြေးညီ ပညာသင်ကြားလေ့လာသင်ယူခွင့် အခွင့်အလမ်းများရရှိစေရေး
အမျိုးသားရေးတာဝန်အဖြစ်ခံယူပြီး ဆောင်ရွက်ပေးနိုင်ပါရန်
ပြည်ထောင်စုအစိုးရအား တိုက်တွန်းကြောင်း” အဆိုကို တင်သွင်းထားသည်ဖြစ်ရာ
ယခု ဆောင်ရွက်ချက်များသည် ပြည်သူကိုကိုယ်စားပြုသော
ပြည်သူ့ကိုယ်စားလှယ်များက လက်ခံနိုင်ခြင်း ရှိ၊ မရှိ ဆိုသည်မှာလည်း
ထည့်သွင်းစဉ်းစားရမည့်အချက်ဖြစ်သည်။

၁၂။ အဓိကစဉ်းစားရန်လိုအပ်သည့်အချက်မှာ (Centre of Excellence)
အဖြစ်ဆောင်ရွက်ခြင်းသည် လုပ်ငန်းစဉ်အားဖြင့် ကောင်းမွန်သည်မှာ
မှန်ကန်သော်လည်း မိမိတို့၏လက်ရှိပကတိ အရှိတရားအခြေအနေကိုပါ
ထည့်သွင်းစဉ်းစားရန်လိုအပ် နေသည်မှာလည်း အမှန်ပင်ဖြစ်နေသည်မှာ မည်သို့မှ
ငြင်းဆို၍ မရခြင်းပင်ဖြစ်သည်။ အဆိုပါတက္ကသိုလ်များတွင်
တစ်နိုင်ငံလုံးးအတိုင်းအတာအရ
ကျောင်းသားများကိုလက်ခံဆောင်ရွက်မည်ဖြစ်သဖြင့် ရပ်ဝေးဒေသမှ ကျောင်းသား၊
ကျောင်းသူများအတွက် အဆောင်စီစဉ်ပေးနိုင်ခြင်းရှိမရှိ၊ မည်ကာမတ္တ
အဆောင်ပေးခြင်းကိုတော့ မည်သို့မျှ လက်ခံ၍ ရမည်မဟုတ်သော်လည်း
လက်ရှိအနေအထားအရ ယခင်ကကဲ့သို့သော ဘော်ဒါဆောင်များထားပေးရန်မှာလည်း
လွယ်ကူပေမည် မဟုတ်သေးသည်ကိုလည်း လက်ခံရမည်ဖြစ်သည်။
လွှတ်တော်အသီးသီးက ပညာရေးပြုပြင်ပြောင်းလဲရေးဆောင်ရွက်ရန်
အားသွန်ခွန်စိုက်စီစဉ်နေချိန်တွင် ၀န်ကြီးဌာန အနေဖြင့်
မိမိသဘောဆန္ဒတစ်ခုတည်းဖြင့်ဆောင်ရွက်နေခြင်းမှာလည်း သင့်တော်ခြင်း ရှိ၊
မရှိ စဉ်းစားခြင့်ချိန်ရန်လိုအပ် နေပေသည်။ ရွာလွန်ရွက်တိုက်မဖြစ်စေရန်မှာ
ယခုအချိန်တွင် အလွန်အရေးကြီးသောအချိန်ဖြစ်ပေသည်။
၁၃။ Hote News ဂျာနယ် အတွဲ-၃ အမှတ်-၁၀၂ ပါ ဆောင်းပါးရှင်
သပြေညို(မိန်းမလှကျွန်း)၏ သဲထဲရေသွန် ဖြစ်ကြတော့မှာလား ဆောင်းပါးကလည်း
ပညာရေးကိစ္စများကိုဆောင်ရွက်ရာတွင် စဉ်းစားစရာ အချက်များကို
ထောက်ပြထားပါသည်။

နိဂုံး
၁၄။ သို့ဖြစ်ရာ ယခု သိပ္ပံနှင့်နည်းပညာဝန်ကြီးဌာနကဆောင်ရွက်မည့်
အဆင့်မြင့်တက္ကသိုလ်များ (Centre of Excellence) စီမံကိန်းများ မည်မျှအထိ
အောင်မြင်မှုရရှိမည်ဆိုသည်ကို ယင်းဝန်ကြီးဌာန၏ ယခင်က ဆောင်ရွက်ချက်သမိုင်း
မှတ်တမ်းများ၊ လက်ရှိဆောင်ရွက်ချက်များ၊

နောင်ဆောင်ရွက်မည့်အနေအထားများကို အောက်ပါအခြေအနေများအပေါ်

•       သင်ကြားရေးအတွက် ဆရာ၊ ဆရာမအင်လား လုံလောက်နေပြီလား၊ သင်ကြားရန်
အသင့်အနေအထားဖြစ်ရဲ့လား
•       သင်ကြားမှုအတွက်လိုအပ်သည့် အထောက်အကူပြုနိုင်မည့် အထောက်အကူပစ္စည်းများ
ပြည့်စုံစွာရရှိရန် စီမံထားရှိပြီးပြီလား
•       သင်ကြားရမည့်အကြောင်းအရာ၊ သင်ရိုးများ မည်မျှအထိ ချမှတ်ဆောင်ရွက်ပြီးပြီလဲ
•       မူဝါဒများကော ခိုင်မာစွာချမှတ်မှုရှိသလား
•       သင်ယူမှုအပေါ်သက်ရောက်မှုနှင့် အောင်မြင်မှုမည်မျှရှိနိုင်မည်နည်း
•       စဉ်ဆက်မပြတ်ဖွံ့ဖြိုးတိုးတက်ရန်မည်သို့စီမံဆောင်ရွက်ထားသလဲ
•       ရန်ပုံငွေသုံးစွဲမှုနှင့် ထောက်ပံ့ဖြည်းဆည်းပေးနိုင်မှုကော သေချာရဲ့လား
•       ယခုဆောင်ရွက်ချက်သည် ပွဲပြီးမီးသေလား၊ Sustainable ဖြစ်အောင်
မည်ကဲ့သို့ဆောင်ရွက်မည်နည်း
ဟူသောအချက်များကို အခြေခံကာ စောင့်ကြည့်လေ့လာရန်သာ ဖြစ်တော့သည်ကို
ဖော်ပြလိုက်ရပါသည်။

သစ်ထူးလွင်